هَپَت 

   

  من بو منصَبه لاپدان گلديم و هاميني حئيرته گتيرديم. چونکي هامي منيم هَپَت اولدوغومو، ايکي ائششگين آرپاسيني بؤله بيلمه ديگيمي بيليردي.  آما بو منيم وئجيمه ده دئييلدي. مگر مملکتيميزده کي  وظيفه  صاحيبلري نين هاميسي ايکي ائششگين آرپاسيني بؤلمه يه قاديرديرلرمي؟ هَپَت  مأمورلاردان ، من هَپَتنين نيي اکسيکدير کي ؟. بير اودور کي، او هَپَتلر خصوصي تاپشيريقلار، رشوه تلر حسابينا وظيفه يه گلميشديلر، آما منيم باشيما  " شاهليق قوشو "  قونموشدو. سانکي منيم بو وظيفه يه گليشيم جناب ميريئلين ناپلئونلا قارشيلاشماسي صحنه سينده کي  کيمي اولموشدو. سوروشورسونوز کي، جناب ميريئلين ناپلئونلا قارشيلاشماسي صحنه سي نئجه اولموشدو؟ اگر سيز ويکتور هوگونون  " سفيللر "  اثريني واختيندا اوخوسايدينيز، ايندي بونو مندن سوروشمازدينيز. من نه قدر هَپَت اولسام دا، بیلیم یوردوندا اوخودوغوم ايللر معليميم گوجله بونو منه اوخوتدورموشدو. يازيق معليميم. ايندي اؤزو سفيلدي، سفيل پروفئسسور... 

            ارتيق قوجالميش هئچ کسه لازيم اولمايان کئشيش ميريئل تصادفا" ناپلئونلا اوز-اوزه گلميشدي. ناپلئون قفيل گئري دؤنه رک کسکين بير شکيلده سوروشموشدو: 

            - مرحمتلي اينسان، نييه منه ائله باخيرسان؟ 

            - اعلاحضرت، سيز قارشينيزدا مرحمتلي بير اينسان گؤرورسونوز، من ايسه بؤيوک بير اينسان سئير ائديرم. هر بيريميز بو تاماشادان اؤزو اوچون معين بير فايدا آلا بيلريک: - دئيه ميريئل جاواب وئرميشدي. ائله همين حاديثه دن بير مدت سونرا جناب ميريئل جين شهري نين يئپيسکوپو تعيين ائديلميشدي. 

            البته منيم اؤزومو يئپيسکوپلا موقاييسه ائتمگيم دوزگون اولماسا دا، هر حالدا هر ايکيميز بير  " تاماشادان "  سونرا بير خوشبختلييه نايل اولموشدوق. ميريئل ناپلئونو، من ايسه باش آچا بيلمه ديگيم اثره تاماشا ائدرکن...  

            ارتيق منده شبهه قالماييب کي، دونيا معجيزه لردن خالي دئييل. منيم کيمي هَپَتنين شعبه  مديرليگيندن ناظير مواويني وظيفه سينه کيمي هئچ بير تاپشيريقسيز، رشوه ت وئرمه دن يوکسلمه سي آز قالا دونيانين يئددي معجيزه سيندن بيريدير. من بوتون بونلاري  سيزي اؤزومه  ياخين بيلديگيم اوچون دئييرم. ياخشي  بيليرم کي، سيز منيم هَپَت اولدوغومو بيلسنيز ده بونو هئچ واخت ديلينيزه گتيرمزسينيز. اؤزونوزو دالدايا وئريب  منيم يئددي بو يانا آرخا دؤنه نيمي دده-بابا سؤيوشلري ايله او کي وار سؤيرسينيز، آما اوزومه دئمزسينيز. سيزين ائله بير قابيليتين يييه سي اولماديغينيزا بلده م.  همن خوشبخت  گون دوز دؤرد آي بوندان قاباق باش وئرميشدي. 

            مدنيت شعبه سيندن آلديغيم تاپشيريغا گؤره صاباحکي گون اوچون پارکين سليقه-ساهمانينا فيکير وئرمه لي، تدبيرلر پلانيني نظردن کئچيرمه لييديم. ناظیر شخصا" اؤزو گله جکدي پارکيميزا.  

            همن گئجه ائوه گئتمه ديم. هردنبير ايستيراحت ائتمک مقصدي ايله اؤزوم اوچون تشکيل ائتديگيم خودماني اوتاغيمدا ييخيليب ياتديم. گون دوغماميش آپاريلان سليقه-ساهمانين حسابينا پارکيميز جنّته دؤنموشدو. عادتي اوزره سيگارت کؤتويو ايله دولو اولان پارکيميزدا  آوارا کيمي تانيديغيميز اوشاقلار بير دنه ده اولسون سيگارت کؤتويو تاپا بيلمزديلر. آغاجلارين ديبي بئلله نيب اهنگلنديگيندن سانکي هره سي بير گولدانا قويولموشدو. آکاسييا، اييده آغاجي نين عطري موختليف  گوللرين عطرينه قاريشاراق دنيزدن گلن مئهله بيرگه آدامين روحونو اوخشاييردي. 

  هر  شئي او قدر اورک آچان و گؤزل،  اينسانلار او قدر خوشبخت گؤرونوردولر کي، سانکي ايشسيزليکدن، بئکارچيليقدان عادي معيشت قايغيلاريندان بئزه رک هردن  " آز قاليرام اؤزومو آسام "  دئين بونلار دئييللر. من طنطنه لي گونلرده گئيديگيم سود رنگلي کوستيومومون آلتيندان ايکي گون قاباق  " لاکوستئ "  فيرماسيندان آلديغيم قارا رنگلي کؤينگيمي  گئيينه رک پاليدي رنگده قالستوک تاخميشديم. من و منيم ايشچيلريم ناظیره خوش گلمه لي ايديک. عکس حالدا چوخ شئيلر اولا بيلردي. 

  نهايت صبرسيزليکله گؤزله ديگيميز آن گليب چاتدي. ايچي من قاريشيق هاميميز ناظیرين ديقتيني  جلب ائتمکدن اؤترو سانکي ياريشا گيرميشديک. سوني تبسسوملر، يازيق گؤرکملر، بير قدر قيسيلاراق ايره لي چيخميش باشلار بيردن-بيره منه چوخ گولونج گؤروندو. ناظیر پارکي دولاشارکن ممنونیتله گولومسه دي. اونون بؤيرونده ايکيقات اولموش رئيسيميز مني ناظیره تقديم ائتمه ديگي اوچون ديشيم باغيرساغيمي کسيردي. ايلاهي، کاش سيز اونون نه قدر  " ريسووکا "  اولدوغونو گؤزلرينيزله گؤره بيليدينيز. ايجرا باشچيسي الي ايله مني گؤستره رک ناظیرين قولاغينا نه ايسه پيچيلدادي، او دا دؤنوب منه باخاراق  گولومسه دي. بو آرا رئيسيم ده عادتي اوزره سوني بير گولوش گؤندردي. بير آنليق منه طرف دؤنن باشلار بير قدر ديکلدي. ايلاهي، بير ييغين باش سوني  تبسسوملرله   منه طرف بويلانيردي. بيردن- بيره بو باشلار منه هله مکتبده اوخويارکن بيولوگييا کابينئتينده کي  ديشلري آغارميش اسکلئتلري خاطيرلاتدي. ايکي داشين آراسيندا بو اسکلئتلر هاردان ياديما دوشدو آخي؟ سفئه بئينيم هر يئرده منه انگل اولا گرک. اؤزومو توپلاييب گويا اوتانيرميش کيمي باشيمي يونگولجه ترپتمکله گؤزومده هله ده اسکلئت کيمي بويلانان باشلارا من ده سوني بير گولوش گؤندرديم.  سونرا قوناقلارلا بيرگه شکيل گالریياسينا گئتديک. باخ منيم طالعييمده کي  خوشبخت يازيلاردان بيري نين سوژئتي محض بو گالریيا ايله باغلي يازيلميشدي. بلي، من هله ده بئينيمده اسکلئت کيمي جانلانان باشلارين آرخاسينجا آستا-آستا گئده رک خاريجي رسساملارين سرگيسيندن عيبارت رسم اثرلرينه اؤتري نظر سالاراق ناظیرين آزاجيق قيميلداماغيني بئله گؤزدن قويموردوم. اصلینده ائله هامي منيم کيمي اؤزونو آپاريردي. بيردن-بيره فيکيرلشديم کي، قفيلدن ناظیر بيزيم گؤزدن يايينيب عادتا" ائتديگيميز بير حرکتي، مثلن هاراسينيسا قفيل قاشيماق ايستسه، بونو اونو گؤزدن قويمايانلارين آراسيندا نئجه ائده بيلر؟ يئنه آخماق فيکيرلر بئينيمي يورماقدا داعوام ائديردي. ائله بونلاري فيکيرلشرکن اؤزومو باش آچا بيلمه ديگيم بير اثرين  قارشيسيندا گؤردوم. بير نئچه ايستيقامتده چکيلميش ختلر و منيم آييرد ائده بيلمه ديگيم قاريشيق   رنگلر...  " ايلاهي آخي بو نه اثردير، گؤره سن، زاليم اوغلو رسسام بونونلا نه دئمک ايسته ييب، آخي؟ بو لاپ منيم بالاجا اوغلومون جيزما-قارالارينا اوخشايير واللاه "  دئيه دوشوندوم. بير ده کي من الييئو دئييلديم کي، اينجه صنعتين بوتون ساحه لريني بئش بارماغيم کيمي بيليم. بو قابيليتي آللاه -تالا هلم- هلم آداما وئرمير. گؤزوجو اطرافيما باخديم. حسد آپارديم ذؤوقلو اينسانلارا. اينتئللئکتوال سويييه نين نه اولدوغونو، بونون منه قيسمت اولماديغيني ياخشي درک ائديرديم. ائله بو واخت چيينيمه توخونان الدن يونگولجه ديکسينديم.   

  -دئيه سن اثر سيزي جوخ دوشوندورور. حتّی اطراف عالمي ده اونوتموسونوز.  

  ناظیر بو سؤزلري منه محبتله باخاراق دئدي و مني لاپ چاش- باش سالدي. اطرافداکيلارين دا منه عئيني محبتله بويلانديغيني گؤروب اورکلنديم.  

  -چوخ قييمتلي اثردير. گؤرونور بو ساحه ني ياخشي بيليرسينيز.  

  -بلي جناب ناظیر، قييمتلي اثردير - دئيه رک ساغ قولومو قاتلاياراق سول قولتوغوما دورتدوم. ساغ اليمي ايسه آغزيما طرف آپاراراق شاعيرانه بير گؤرکم آلديم. 

  - جناب ناظیر، پيرييئو پارکين ديرئکتورودور.                          

  زهلمگئتميش رئيسيميز يالتاقجاسينا مني يئنيدن ناظیره تقديم ائتدي. 

   - گؤزل، گؤزل ... سانکي پارکينيز خصوصي رسسام طرفيندن ايشلنميش صنعت اثري ايدي. ذؤوق، ذؤوق آيري شئيدير - دئيه ناظیر حؤرمتله منيم اليمي سيخدي. فرحيمدن اوچونور، هم ده اوتانيرديم. آي آللاه، مني بنده لرين واسيطه سي ايله اله سالمانا نه احتيياج وار آخي؟ هئچ رنگلريني بئله آييرد ائده بيلمه ديگيم بير اثره ديقتله باخديغيم اوچون آداملارين ديقتيني منه يؤنلتمکله مني اؤز قارشيمدا آبيردان ساليرسان؟ دوز يئددي گوندن سونرا رئيسيم زنگ ووراراق تعجيلي ناظیرين قبولوندا اولماغيمي تاپشيردي. ايچيمدن بير ايستيليک کئچدي. خئير اولا بالام؟ ناظیر هارا من هارا؟ يئنه منه نه تاماشا حاضيرلاميسان آي آللاه؟ - دئييب ماشينيمي ناظیرلييه طرف سوردوم. 

  -پيرييئو سيزسينيز؟ 

  -بلي. 

  -کئچين.   

  کاتيبه سانکي امر ائتدي. من   يالتاقليق قاريشيق سوني بير گولوشله ايچري کئچديم.                     

  -         گه لين پيرييئو، خوش گلميسينيز. - ناظیر اليني منه طرف اوزاتدي.  

  اونون  بير   گؤز قيرپيميندا ايکيقات  اَييليب سيخديغيم الي پيله کيمي يومشاق ايدي.  بيز بير چوخ شئيلر حاقيندا خئيلي دانيشديق و من صاباحکي   گون ناظیرلييه شعبه  مديري کيمي گلديم. قاباقجادان دئديگيم کيمي گلديم و هاميني حئيرته گتيرديم. مني تانييانلاري ان چوخ حئيرته گتيرن منيم خوشبخت گونلرين بيرينده ناظیر معاويني تعيين اولونماغيم  اولدو. بو سعادت منه اؤلکه ميزده  " کاسيبچيليقلا مباريزه "  مؤضوسونون مذاکره سي زامان اولدو. من اؤزومه گؤره چوخ داهييانه بير تکليفله چيخيش ائتديم. منيم چيخيشيم بئله ايدي:  "  يولداشلار  بيز چوخ گلوبال (بو سؤزدن چوخ خوشوم گلديگي اوچون يئرلي-يئرسيز ايشله ديرديم) بير مؤضويا توخونوروق. بلي، اؤلکه ميزده کاسيبچيليغا سون قويماق هر بير وطنداشي دوشوندورمه ليدير. بئله کي من اؤزوم ده بو باره ده هميشه دوشونورم. بير اؤلکه نين وطنداشلاري يوخسوللوق ايچريسينده ياشاييرسا، کناردان باخانا ائله گه لر کي، ائله همين اؤلکه اؤزو ده يوخسولدور. آللاه تعالا بيزيم اؤلکه ميزدن هئچ نيي اسيرگمه ييب. آغ-قارا قيزيليميز، يني نئفتيميز و پامبيغيميز، تاخيل زميلريميز، آز قالا بوتؤو روسييا بازاريني تامين ائدن مئيوه-تروز ساحه لريميز، قيزيل ياتاقلاريميز، ايشگوزار اينسانلاريميز، ايگيد اوغوللاريميز، گؤزل قيزلاريميز، (لنت شئيتانا، گؤزل قيزلارين يوخسوللوقلا موباريزه يه نه دخلي وار آخي) بو آرا بئينيمه تپينديم. ايستعدادلي يازيچيلاريميز، موسيقيچيلريميز، رسساملاريميز... بير سؤزله، بيزيم اؤلکه ميزده هر کسه خصوصي بير وئرگي وئريليب، سانکي.  " وئرگي دئديکده سون واختلار اللريندن زنجير چئينه ديگيم وئرگيلر اداره سيني بئينيم منه خاطيرلاتدي. بو وئرگيلر سؤزونون ائله چالارلاري وار کي... آرتيق منده شوبهه قالماييب کي، دوغرودان دا وئرگيلر مملکتيميزده  " آللاه وئرگيسي " دير. "  دئيه سن مطلبدن چوخ يايينديم. من چيخيشيمي بئله بير تکليفله سونا يئتيرديم.  " جنابلار، تکليف ائدرديم کي، کونستيتوسيياميزا بئله بير بند علاوه  ائديلسين. اؤلکه ده وارلي عاييله لر کاسيب عاييله لرله قوهوم اولسونلار. بو، پروبلئمين حللي اوچون ان صرفه لي يولدور. ديقتينيزه گؤره تشککور ائديرم.  

  ناظیرين ايشاره سي ايله اوتورانلارا نظر سالديم. مني آلقيشلايان اللرين سانکي باشلاردان خبري يوخ ايدي.  

  اينانين، منيم تکليفيم ناظیرليکده بؤيوک عکس- صدا دوغوردو. حتّی شعبه  موديرلريندن بيري اولان جناب دميروو منيم کابينئتيمه گلدي. (دميروو دئديگيمين سويادي بيلميرم  " دميروو "  خسته ليگيندنمي، يوخسا برک جيسيم ساييلان دميردن آلينميشديمي، آما اونو بيليرم کي، اوندا دمير کيمي مؤحکمليکدن اثر-علامت يوخ ايدي. مثلن اونا پلاستينوو دئسه لر داها ياخشي سسلنردي. دوغرودان، گؤرون نه گؤزل سسله نير، پلاستينوو. يعني اونو ايسته ديگين واخت اَييب ايسته ديگين فورمايا سالا بيليرسن. )  

  - جناب پيرييئو، سيزين دوننکي چيخيشينيز سانکي مني قفلت  

  يوخوسوندان اوياتدي. اوغلوم قاراباغ قاچقينلاريندان اولان بير قيزي سئويردي. هئچ جور راضيلاشا بيلميرديم. ايندي فيکريمي دييشميشم. آلاجام او قيزي اوغلوما، آرخا اولاجام اونلارا. قوي، بير عاييله نين کاسيبچيليغينا سون قويولسون.  

            دوغروسو فرحلنديم. دؤنه-دؤنه اونون اليني سيخديم. اؤزومدن چوخ راضي قالديم. آخي منيم آز قالا تعريفي يوخاريلارا چاتان بو هَپَتدان نييم عکسيک ايدي. بيرجه... او قاپيدان چيخماق ايستيرکن اؤزومده جرأت تاپاراق اونو ساخلاديم.  

  -         دميروو، سيز سيرر ساخلايا بيليرسينيز؟ 

  -         البتته. 

  -         بيليرسيز، منه عذاب وئرن بير شئيي سيزه دئمک ايسته ييرم.  

  من ساعاتلارلا قولاق آسديغيم پانتوميم تاماشالاردان، جيزما-قارا رسم اثرلريندن، اولي-آخيري بيلينمه يه ن بديعي اثرلردن بير شئي آنلايا بيلمه ديگيمي يازيق-يازيق دميرووا دانيشديم. او يئريندن ديک آتيلاراق منه طرف گلدي. سانکي اورگيم قيريلدي. اييليب قولاغيما پيچيلتي ايله دئدي.  

  -         سوس. گويا ائله...  

  -         نه؟؟؟ 

  -         هه! 

   

ساحیله